मुकरियाँ

- सँझहीं आके जालन कबो, भोरहरिया में आवेलन ।

आधी रात में आवस कबो ,पूरा रात बितावेलन।

गायब हो जालन कबो ,इहे बा उनकर धंधा ।

ए सखि साजन ! ना सखि चँदा ।

2- कबो ऐने कबो ओने ,दिन भर उ माकेलन ।

    गारी सुनस भा लाठी खास ,सगरो घुस के                   झाँकेलन ।।

   उनका से बतिआवे में , केहु न पावे पार ।

  ए सखि साजन ! ना सखि पत्रकार ।।

3- डँरवारी के डाँक के ,भोरहरिया में आवेला ।

    अपने आवे के धमक से, हमरा के जगावेला ।।

ओकरे से हम जानिला , देश दुनिया के समाचार ।

ए सखि  साजन ! ना सखि अखबार ।।

  4-  नकिअवले बा एतना कि ,सुध बुध      भुलाईल बा ।

    जिअल भार भईल बा अब , जिनिगी से जी अकुलाईलबा ।।

मन करत बा लईकन के , खिया के ज़हर खाई ।

ए सखि साजन ! ना सखि महँगाई ।।

5  संगे लेके घुमिला ,ओकरा के हम शान से ।

    सुटूर सुटूर बतिआवेला , सटके हमरा कान से ।।

हमसे झटसे कहि देला , केवनो खब़र जे आईल ।

ए सखि साजन ! ना सखि मोबाईल ।।

6 - ओकरा सोझा बईठके ,घंटो ओके निहारिला।

ओकर करतब देखके ,सब कुछ ओ पे वारिला ।।

बड़ी सुख देबेला उ , रात दिन हर सीजन ।

ए सखि साजन ! ना सखि टेलीविजन ।।

7- कब आई कब आई ,इहे सोच के हम अकुलाईला ।

आवत के जे देख लिहींला , बड़ी खुश हो जाईला ।।

आँखि के सोझा खाड़ देखके , फ्रेश हो जाला ब्रेन ।

ए सखि साजन ! ना सखि ट्रेन ।।

 8 -बड़ी निक लागेला उनकर ,बोली अउरी तेवर ।

दुसरे बदे बरल करेलन ,उ धुरी में जेंवर ।।

उनका सोझा ना चलेला , केहु के अकील ।

ए सखि साजन ! ना सखि वकील ।।

9  उनका ओरी देख देख के , सबके मन ललचेला ।

जालन जेकरा पंजरा ,उ बड़ी घघचेला ।।

केकरो में ना देखलीं, ताकत उनका जइसा ।

ए सखि साजन ! ना सखि पइसा ।।

10- सकपका जाला सभे ,जसहीं परेला नज़र ।

धकपक मनवा करेला , परेला देह पे बजर ।।

मँगला पे जे ना दिही त , उनका के घसिटी ।

ए सखि साजन ! ना सखि टी टी ।।

11– ओकरा अवते बड़ बड़ सेर , बनि जाला सियार ।

गदहो के बाप कहेला , करेला झुक के नमस्कार।।

गदहवो मौका ताड़ के , खाला खुबिए भाव ।

ए सखि साजन ! ना  सखि चुनाव ।।

12- उहे बा कि हमरा के , सुघर संसार देखावेला ।

कबो कुछो पढ़वावेला , कबो कुछो लिखवावेला ।।

सफर के साथी होला उ , रेल मा भा बस मा ।

ए सखि साजन ! ना सखि चश्मा ।।

13 - जेकरा भिरी रहेला , ओकर मान बढ़ावेला ।

जेकरा भिरी ना रहे त , ओकरा के तरसावेला ।।

सब अछइत ओकरे बिना , करेजा सबके खउलत ।

ए सखि साजन ! ना सखि दउलत ।।

14  एतना ताकत बा ओकरा में , बड़ बड़ लोग झुक जाला ।

मालामाल करे केहु के , केहु के देवाला ।।ओकरा आगे केहु ना ठहरे , मारेला जब चोट ।

ए ,सखि साजन ! ना,सखि नोट ।।

15- साँझ सबेरे जबे तबे, सब ओकरा के जोहेला ।

आँखि के आगा आ जाला त , सबके मन के मोहेला ।।

ओकरा बिना एको दिना , हमरा रहल न जाय ।

ए सखि साजन ! ना सखि चाय ।।

16 जबले उ दुआर पर रही, घर में केहु आई ना ।

बर्तन बासन गहना गुरिया , टकसी एको पाई ना ।।

ओकरा बिना कइसे कतहुँ , जाईं नाहीं बुझाला ।

ए सखि साजन ! ना सखि ताला ।।

17- रात भर जागल , भिनुसहरे आँख मुँदाइल ।

जेतना सनेह भरल रहे , बूँदे बूँद ओराइल ।।रोज राती के हमरा खातिर , जरावे आपन जिया ।

ए सखि साजन ! ना सखि दिया ।।

18 - कबो देला दुख उहे , देला कबो सुख ।

केहु नाहीं जाने कब , केने बदली रुख ।।

कबो लउके लाल उजर ,होला कबो करिया ।

ए सखि साजन ! नाहीं बदरिया ।।

19- ई दइया निरदइया , बहुते हमे सतावेला ।

रोज राति के आके , हमरा के किकुरावेला ।।पँजरा आवे जसहीं तसहीं , काँपे लागे हाड़ ।

ए सखि साजन ! ना सखि जाड़ ।।

20 - केहु के जीवन , मरन केहु के भाखेला ।

केहु के उतारे पगरी , मोंछ केहु के राखेला ।।

केहु के भिखारी ,बनावे केहु के दानी ।

ए सखि साजन ! ना सखि पानी ।।

कुछ लड़को के तरफ से ..........

21 - बहुते दुख उठवलीं हम , जबले ओकर साथ धराइल ।

ओकरे कारन खेत बधार , अउर हमार घर बार बेंचाइल ।।

तबो ना छोड़लीं ओकर साथ , छूट गईल भले मेहरारु ।

ए गोंइया गोरकी ! ना गोंइया दारु ।।

22 - ओकरा फेरा में फँस के , फूँक दिहलीं हम दउलत ।

खाली हो गईल हाथ हमार , करेजा बाटे खउलत ।।

ओकरे कारन देहियों के, बिगड़ल बाटे दासा ।

ए गोंइया गोरकी ! ना गोंइया नाशा ।।

23 - जेने उ चलेले , ओने उठ जाला तुफान ।

जान बचावे केहु के , केहु के लेले जान ।।

घाव करेले जेतना ,ओतना नाहीं करी बल्लम ।

ए गोंइया गोरकी ! ना गोंइया कलम ।।

24 - आवेले त दुख देले , जाले जसहीं होला अन्हार ।

लड़ेले त प्यार करेले ,गुँड़ेरे त होला तकरार ।।

तिरछी ताके जसहीं तसहीं , फरके मन के पाँख ।

ए गोंइया गोरकी ! ना गोंइया आँख ।।

25 संगे ओकरा बईठीला ,त आवेला उन्घाई ।

इहे मन करेला कि , मुँह फेर सुत जाईं ।।

बाकिर संगे ना बइठब त , दुसर मिली खिताब ।

ए गोंइया गोरकी ! ना गोंइया किताब ।।

26 - जबले ओकरा फेरा में पड़लीं , पातर भइल दिन ।

रसगुल्ला खियाइला , काढ़ काढ़ के रिन ।।

देख ! ओकरा कारन अबही , केतना बिपत घहरी ।

ए गोंइया गोरकी ! ना गोंइया कचहरी ।।

27- केतने पापड़ बेलनी हम , तब जाके मिलल ।

हमरा जीवन के गड़ही में , सुघर कुँइया खिलल ।।

ओकरा अवते भर गईल , संबंधन के टोकरी ।

ए गोंइया गोरकी ! ना गोंइया नोकरी ।।

28 - सँउसे संसार में घुमि घुमि , बघारब केतनो सेखी ।

ओकरा रहते हमरा के ,घिरना से सभे देखी ।।जबले रही चिढ़ाई सभे , हमरा के लिबी लिबी ।

ए गोंइया गोरकी ! ना गोंइया गरीबी ।।

29 - ओकरे मुँह देख के , रोज सबेरे जागिला ।

ओकरे मुँह देख के , रोज काम पे लागिला ।।

जहिया उ बिगड़ जाले , अकाज होला बड़ी ।

ए गोंइया गोरकी ! ना गोंइया घड़ी ।।

30 - कहे सुने में निमन लागे , चर्चा ओकर चलाइला ।

आवेला जब मौका , ओकरा पँजरा ना जाइला ।।

ओकर गुन गाईंला , निभाईंला दुसरे संगे इयारी ।

ए गोंइया गोरकी ! ना गोंइया ईमानदारी ।।